Yield-et e bonove 12-mujore bien sërish, prekin nivelin më të ulët që prej shtatorit

Yield-et e bonove 12-mujore pësuan një tjetër rënie të ndjeshme në ankandin e kësaj jave, duke prekur nivelin më të ulët që prej muajit shtator të vitit të kaluar.

Sipas Bankës së Shqipërisë, yield-i mesatar i ponderuar zbriti në 4.44%, nga 4.86% që kishte qenë në ankandin e mëparshëm, të datës 31 janar. Pjesëmarrja e investitorëve në ankand rezultoi sërish e lartë dhe shuma totale e kërkesave të paraqitura arriti në 20.4 miliardë lekë, nga 11 miliardë lekë që kishte qenë shuma e shpallur për financim nga Ministria e Financave dhe Ekonomisë (MFE).

Siç ka ndodhur shpesh në muajt e fundit, edhe në këtë rast MFE e rriti shumën e pranuar të ofertave me 15%, për një vlerë totale emetimi prej 12.65 miliardë lekësh.

Rënie pësoi edhe yield-i mesatar i ponderuar i bonove me maturim 3-mujor, që zbriti në 2.76%, nga 3.03% që kishte qenë në ankandin e mëparshëm. Edhe këtu kërkesa e investitorëve ishte më e lartë shuma prej 1.5 miliardë lekësh e shpallur për financim nga qeveria shqiptare.

Tregu primar i letrave me vlerë të qeverisë shqiptare po vijon korrektimin nga rritja shumë e fortë e yield-eve që u vërejt vitin e kaluar, për shkak të ritmit të shpejtë të rritjes së normave të interesit nga Banka e Shqipërisë.

Por, pas muajit dhjetor, sinjalet e rënies së inflacionit dhe frenimi i rritjes së normës bazë nga ana e Bankës Qendrore kanë ndikuar në një stabilizim të dukshëm të tregut dhe zbritjes së yield-eve drejt vlerave më proporcionale me sinjalet e dhëna nga politika monetare.

Një element i dukshëm që po mbështet uljen e yield-eve është rritja e pjesëmarrjes së investitorëve në ankande.

Qetësimi i presioneve inflacioniste dhe pauza e vendosur nga Banka e Shqipërisë në rritjen e interesave ka reduktuar pasigurinë e investitorëve dhe sidomos të bankave tregtare, që janë edhe financuesi kryesor i borxhit të brendshëm të qeverisë.

Një faktor tjetër që duket se po favorizon rritjen e investimit në instrumentet e borxhit qeveritar është ngadalësimi i ndjeshëm i kreditimit, pas tremujorit të fundit të vitit të kaluar. Rritja e normave të interesit ka pasur një ndikim të fortë si tek oferta, ashtu edhe tek kërkesa për kredi bankare.

Në këto kushte, bankat duket se po kanalizojnë më shumë investime në tregun e titujve qeveritarë, që kanë ofruar kthime të kënaqshme me rrezik të ulët, përkundrejt rreziqeve në rritje të perceptuara në financimin e sektorit privat.

Korrigjimi në ulje i yield-eve është një zhvillim pozitiv për qeverinë shqiptare, por edhe për shumicën e huamarrësve privatë në vend. Rritja e fortë e yield-eve ishte reflektuar edhe në rritjen normave të interesit të kredive me interesa të ndryshueshëm në lekë.

Ulja e yield-eve do ta zbusë shtrenjtimin e kësteve të kredisë dhe do tu japë frymëmarrje huamarrësve, por njëkohësisht do ta bëjë më pak të vështirë procesin e normalizimit të normave të interesit nga nivelet më të ulëta historike ku kishin qëndruar për muaj me radhë./E.Shehu

Burimi: BSH