Vazhdon protesta, Prishtina pa transport publik tani e tri ditë

Transportuesit privatë dhe publikë po e vazhdojnë ditën e tretë të protestës, duke e lënë edhe sot kryeqytetin pa transport publik. Protesta ka nisur të hënën para Qeverisë dhe Kuvendit, ndërsa të martën është zhvendosur në rrugët e kryeqytetit.

Banorët e Prishtinës, për të tretën ditë me radhë janë detyruar që të bëjnë zgjidhje alternative në mungesë të transportit publik.

Për pasojë, kolona të gjata janë krijuar në kryeqytet e qytetarët janë përballur me pritje të gjata, ndërkohë që Qeveria në detyrë dhe zyrtarët komunalë kanë vazhduar akuzat ndaj njëri-tjetrit për situatën e komplikuar në komunë.

Transportuesit e “Trafikut Urban” dhe ata privatë protestuan dje para Komunës së Prishtinës e Qeverisë duke kërkuar që t’u bëhet pagesa.

Në një formë tjetër të protestës, ata për më shumë se dy orë pranë objektit të Komunës së Prishtinës dhe po ashtu pranë objektit të Qeverisë, vendosën autobusët.

Në këtë segment të rrugës që lidh dy institucionet u krijuan kolona të gjata.

Sindikalistët e “Trafikut Urban” dhe operatorëve publiko-privat kanë thënë se grevën do ta vazhdojnë deri në realizimin e kërkesës së tyre.

Kryetari i Komunës së Prishtinës, Përparim Rama tha dje se sa i përket situatës me punëtorët e Trafikut Urban, Ministrit Muratit as që i intereson kjo pjesë.

Tha se i ka bllokuar edhe fonde të tjera, teksa pjesëmarrja e tij në protestën e punëtorëve tha se erdhi me ftesë të tyre.

“I kanë bllokuar edhe fondet e tjera, edhe fondin për investime kapitale e shumë fonde tjera që na kanë pamundësu me i kry punët në kryeqytet, e me na qit neve keq që me i fitu zgjedhjet. Ministrit në detyrë nuk i intereson, pa asnjë emocion sillet ndaj protesuesve. Më ftuan dhe u bashkangjita”.

Ai tha se punëtorët kanë punuar me muaj të tërë pa pagesë, me shpresën se pas zgjedhjeve do të paguhen.

Ndërkohë, ministri në detyrë i Financave, Punës dhe Transfereve, Hekuran Murati ka deklaruar se e gjithë kjo situatë është pasojë e vendimeve të Ramës, të cilat i ka cilësuar si “elektorale”.

“Së pari kemi dy probleme në këtë situatë. Problemi i parë në transportin publik është se ky është një problem i vetë-shkaktuar dhe do të ndodhte edhe po të ishte miratuar buxheti i vitit 2025 për Komunën e Prishtinës, pasi janë marrë vendime elektorale për lirimin e shumicës së kategorive të qytetarëve nga pagesa”.

“Kjo ka bërë që shumica e qytetarëve të mos paguajnë bileta dhe barra financiare t’i mbetet Komunës së Prishtinës, në një kohë kur nuk ka pasur buxhet të miratuar”, ka thënë Murati.

Për këtë situatë, Kuvendi Komunal i Prishtinës të enjten ka thirrur një seancë të jashtëzakonshme për mjetet vetanake dhe buxhetin e vitit 2026.

Greva ka lënë Prishtinën pa transport publik, duke u shkaktuar vështirësi të mëdha mijëra qytetarëve.