Nevoja për punonjës nga ata më pak të kualifikuar deri tek ata me kualifikim të lartë për sektorin e turizmit e ka vënë këtë të fundit në një presion të vazhdueshëm për të rishikuar pagat.
Vetëm vitin e shkuar, paga mesatare për efekt kontributesh në sektorin e turizmit është rritur me 23%, të paktën kështu rezulton nga një analizë e Drejtorisë së Përgjithshme të Tatimeve për shifrat e 2023.
I njëjti raport analizon edhe efektin që ka pasur rekordi turistik i vendit ku vihet re rritje e numrit të subjekteve në raport me 2022, më shumë të punësuar, si dhe rritje e Tatimit mbi të Ardhurat Personale.
“Referuar xhiros nga fiskalizimi për të gjithë NIPT-et e popullatës se turizmit, për muajin gusht 2023 kanë rezultuar me rritje të xhiros me 7%.
Ndërsa për tatimpaguesit që rezultojnë në të dy vitet, rritja e xhiros është rreth 6%. Nga krahasimi i listë-pagesave të periudhës 2023 – 2022 si listë-pagesa e fundit totale për popullatën e tatimpaguesve të sektorit turistik rezultojnë këto të dhëna: – Rritje në numrin e tatimpaguesve me +12% krahasuar me të njëjtën periudhë një vit më parë dhe një rritje me vetëm +2% të numrit të punonjësve; – Rritja në pagën mesatare për kontribute është +23%; – Rritje e TAP me + 33%” thuhet në raport.
Sipas raportit që në fillim të vitit, Tatimet kishin një plan për turizmin në bazë të analizës së riskut në bazë të të cilës ishin elementë si: turizëm pa fatura për periudhe 1 javore 50, rënie Xhiro krahasim mujor, më pak se 7 punonjës pa përgjegjësi TVSH-je, subjekte përgjegjësi tatimore por me rënie qarkullimi nga java në javë më shume se me 10% si dhe një sërë elementësh të ngjashëm.
Teksa në njërën anë si emergjencë për sektorin e turizmit edhe këtë vit është nevoja për punonjës, kur flukset e vizitorëve pritet të rriten, në anën tjetër qeveria, ka deklaruar se do të ketë një qasje më të ashpër ndaj informalitetit dhe evazionit.
Vetë kreu i qeverisë Rama në disa dalje publike ka nënvizuar se net qëndrimet në struktura nuk përputhen me zhvillimet në sektor ku numri i hyrjeve në fund të dhjetorit 2023 ishte 10.15 milionë turistë duke nënkuptuar se ka nëndeklarim./N.Maho
Ky është artikull ekskluziv i Revistës Monitor, që gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”.
Artikulli mund të ripublikohet nga mediat e tjera vetëm duke cituar “Revista Monitor” shoqëruar me linkun e artikullit origjinal.
Kjo eshte e pavertete. Eshte nje sajese e organeve publike. Cfare ka ndodhur ka qene rritja e vazhdueshme e pages minimale dhe per rrjedhoje edhe vlera e kontributeve te detyrueshme. Statistikisht kjo rritje e nivelit fundor sjelle rritjen e vleres mesatare, e cila sot trumbetohet si pasoje ekonomike e turizmit, por qe ne fakt eshte vetem per shkaqe artificiale te rritjes se pagimit te detyrimeve me vendim nga qeveria.