Policia belge bastis shërbimin diplomatik të BE-së për dyshime mashtrimi

Policia belge ka bastisur Shërbimin e Veprimit të Jashtëm të BE-së (EEAS) në Bruksel dhe Kolegjin e Europës në Bruges, si pjesë e një hetimi për dyshime mashtrimi, bëri të ditur të martën Zyra e Prokurorit Publik Europian (EPPO).

Sipas prokurorëve, tre persona u ndaluan në kuadër të hetimit, i cili lidhet me trajnime të financuara nga BE-ja për diplomatët e rinj.

Sipas transmetuesit belg VRT, mes personave të ndaluar dyshohet të jetë edhe Federica Mogherini, ish-shefja e diplomacisë së BE-së dhe aktualisht drejtuese e Kolegjit të Europës. Prokurorët europianë thanë se nuk mund të bëjnë publike identitetet.

Bastisjet u kryen të martën, me kërkesë të prokurorëve, në disa godina të EEAS, në Kolegjin e Europës, si dhe në banesat e personave të dyshuar. Kolegji i Europës është një institucion ku të diplomuarit nga vendet anëtare të BE-së përgatiten për karriera të mundshme në institucionet europiane.

Prokurorët thanë se kanë “dyshime të forta” për mashtrim në një tender që dha një program trajnimi nëntëmujor për diplomatët e rinj të vendeve anëtare në periudhën 2021–2022. Tenderi u zhvillua nga shërbimi diplomatik i BE-së dhe u fitua nga kolegji.

Kolegji i Europës nuk pranoi të komentojë mbi raportimet, ndërsa EEAS nuk ishte menjëherë i disponueshëm për koment./ Reuters