Këshilla për të pasur ndikim në punë, besimi krijohet por edhe shkatërrohet shumë shpejt

Edhe mënyrat më të vogla të sjelljes mund të bëjnë ndryshim të madh në mënyrën si të tjerët ju perceptojnë, veçanërisht në vendin e punës.

Mënyra si mbani krahët. Sa shpejt ose ngadalë flisni. Shprehjet e fytyrës. Të gjitha ndikojnë në përshtypjen që lini, thotë Vanessa Van Edwards, kërkuese sjelljeje dhe autore bestseller, që jep një program në Harvard për “komunikimin efektiv organizativ”.

“Besimi ndërtohet, ose shkatërrohet tmerrësisht shpejt,” thotë Van Edwards.

Sa më shumë besim ndërtoni me kolegët dhe shefin, aq më shumë ndikim fitoni. Një pjesë lidhet me veprimet: Nëse bashkëpunoni mirë dhe dorëzoni punën në kohë, ndërtoni një reputacion pozitiv.

Por disa njerëz të suksesshëm e nisin ndërtimin e besimit me gjuhën e trupit, thotë Van Edwards, e cila është edhe instruktore e kursit “People Intelligence” në MasterClass. Konkretisht, ata përdorin tre ndryshime të vogla fizike për të transmetuar besim dhe përgjegjshmëri:

1. “Duar të lirshme dhe kontakt me sy”

Imagjinoni këtë: I afroheni një kolegu për një bisedë të shkurtër. Ai ka krahët e kryqëzuar dhe shikon përreth, jo te ju. Mund të jetë nervoz, por ju me siguri mendoni se s’ka interes.

“Fshehja e duarve dhe shmangia e kontaktit me sy, që mund të ndodhë aksidentalisht kur kontrolloni telefonin, e gërryen menjëherë besimin,” thotë Van Edwards.

Për të treguar “hapje dhe angazhim”, praktikoni “duar të dukshme dhe kontakt me sy”. “Mundohuni të bëni kontakt me sy në momentin e afrimit ose në sekondat e para të bisedës”, si dhe në fund të saj.

S’keni pse të shihni dikë gjatë gjithë kohës: kontakti duhet të jetë domethënës, veçanërisht kur dikush ndan diçka serioze apo të ndjeshme.

2. “Lëvizje të qeta dhe të menduara”

Kur njerëzit janë të pasigurt ose të shqetësuar, flasin ose lëvizin më shpejt se zakonisht. Sjellje të tilla shpesh gjykohen negativisht, sipas një studimi të vitit 2012 nga Universiteti Ryerson.

“Ngadalësoni lëvizjet. Energjia nervoze na bën të lëvizim me nxitim, por lëvizjet e qeta tregojnë kontroll,” këshillon Van Edwards. “Ngadalësoni ritmin e të folurit dhe shtoni pauza. Kur ndalojmë, marrim frymë më thellë dhe tingëllojmë më të qetë.”

Mbajtja e një qëndrimi të drejtë, “maksimizimi i distancës mes veshëve dhe shpatullave”, rrit gjithashtu perceptimin e besimit dhe kompetencës.

3. Jini “të afrueshëm, por me autoritet”

Mund të mendoni se respekti fitohet duke qenë vetëm serioz. Ose se për t’u pëlqyer duhet të jeni gjithmonë shoqërorë. Por besimi ndërtohet kur balanconi “ngrohtësinë dhe kompetencën”.

“Jini të afrueshëm, por me autoritet. S’keni pse të sakrifikoni respektin për t’u pëlqyer, performuesit e lartë e marrin të dyja. Shfaqni ngrohtësi duke mbajtur mend detaje personale dhe duke u gëzuar sinqerisht për lajmet e mira të të tjerëve.”

Nëse shefi juaj pëlqen New York Yankees, mund t’i përmendni ndeshjen e fundit fituese. Mbajtja mend e objektivave të dikujt apo mënyrës si preferon të komunikojë tregon dëgjim aktiv dhe kujdes.

“Veprimet e vogla dhe të qëndrueshme bëjnë diferencën,” thotë Van Edwards. / CNBC