Hekurudhat zvogëluan humbjen por sërish mbetën minus 427 milionë lekë

Kompania publike Hekurudha Shqiptare ka zvogëluar me të paktën katër herë humbjen e saj në vitin e shkuar por bilanci i saj negativ vijon të mbetet në 427 milionë lekë apo rreth 3.5 milionë lekë.

Në vitin 2020 që ishte edhe viti i kulmit të pandemisë së COVID-19 kompania regjistroi një humbje prej 2 miliardë lekësh. Hekurudhat prej vitesh mbeten në terren negativ sa i takon performancës së tyre financiare e lidhur kjo me problematikat që e shoqërojnë sektorin ku ndër të tjera infrastruktura tejet e amortizuar, mungesa e shfrytëzimit të plotë të këtij lloji transporti, punonjësit që gjithsesi mbeten të emërtuar.

Në vend hekurudha funksionon në segmente të caktuara ku kompani të ndryshme zgjedhin të transportojnë produktet apo materialet e tyre në këtë formë.

Të ardhurat e Hekurudhës Shqiptare kanë pësuar ulje me më shumë se 13 për qind duke regjistruar një nivel prej 70 milionë lekë. Këto janë të ardhurat nga aktiviteti kryesor i saj ndërkohë që të ardhurat nga aktiviteti i shfrytëzimit llogariten në 15.9 milionë lekë.

Shpenzimet nga ana tjetër që lidhen me amortizimin dhe zhvlerësimin në vitin 2021 ishin 342 milionë lekë apo rreth 3 milionë euro. Zëri i këtyre shpenzimeve është ulur me më shumë se 5 herë në raport me vitin 2020 kur llogariteshin më shumë se 1.8 miliardë lekë.

Kostot e personelit nga ana tjetër janë rritur në vitin 2021 me gati 10 për qind në raport me vitin 2020.

Ndryshimet në bilancin e hekurudhës duket se janë të lidhura direkt edhe me zhvillimet dhe nisjen e investimeve nga ana e kompanisë publike ku tashmë prej vitit te shkuar ka nisur puna për zbatimin e projektit të rehabilitimit të linjës hekurudhorë Tiranë-Durrës si dhe zgjatimin e saj deri në Aeroportin e Rinasit.

Ndërkohë së fundmi qeveria ka kërkuar mbështetjen e BERZH për një tjetër projekt hekurudhor që ka të bëjë me linjën Vorë-Hani i Hotit. Qeveria ka paraqitur një koncept që është në rishikim nga ana e Bankës dhe që lidhet me rehabilitimin e 120 kilometrave hekurudhë.

Në dokumentin përmbledhës thuhet se projekti i rehabilitimit të hekurudhave do të bashkë financohet nga Banka Evropiane e Investimeve (EIB) dhe Bashkimi Evropian (BE) përmes Kornizës së Investimeve të Ballkanit Perëndimor (WBIF) dhe kostoja totale e saj të jetë 267 milionë euro nga të cilat pranë BERZH është kërkuar 62.9 milionë euro./N.Maho